Пресвятая Владычице Богородице, Благодатная Богородительнице, Преблагословенная Богоблагодатная Мати, Божества приятелище, Единороднаго Сына Безсмертнаго и Отца Незримаго огнеобразный престо́ле; Всенепорочная, Всепречистая, Всепетая, Всеблаженнейшая, Всенеприкосновенная, Всечестна́я, Всеублажаемая, Всеблагословенная, Всевожделенная Дево душо́ю и духом, такожде и телом; престоле Царя, на Херувимех седящаго; врата небесная, имиже на небо и мы восходим; Богоневестно, еюже с Богом примирение прииде нам; непостижимое чудо, неуразумеваемое известие; откровение Божия тайны сокровенныя; непобедимое предстательство, крепкое защищение; живоносный источниче, море неисчерпаемое дарований Божественных; высото, небесныя Силы превосходящая; глубино таинственных мыслей неизследимая; общая по Троице всех Владычице; всем, по Уте́шителе Дусе Святем, Уте́шительнице; за весь мир, по Единем Ходатае Христе Спасе, Ходатаице; колеснице мысленнаго Солнца, истиннаго Света, просвещающаго всякаго человека, грядущаго в мир; носящаго всяческая словом Своим носящая; мо́сте вселенныя, к премирному небу преводящий; Херувимов и Серафимов высшая и без сравнения славнейшая; Ангелов украшение, человеком спасение; Мати и рабо́ звезды незаходимыя; неизреченнаго человеколюбия Божия без дно; тве́рдое основание правыя веры; молние, души озаряющая; охранение на высоту восшедших, надеждо во глубину зол падших; крепосте бодрствующих, возбуждение ленивых; Церквей единомыслие, царств благоустроение; мире всея вселенныя; небесе и земли Царице!

Тобою хвалюся! На Тя надеюся! Тя прославляю! Не и́мам бо иныя кроме́ Тебе помощи и защищения. Да не буду безплоден в молениях к Тебе: и́маши бо силу, яко Единаго от Троицы неизреченно родившая; имаши, о чесо́м можеши умолити Его и умилостивити: се бо – руце Твои, имиже носила Его, Ему покажи; се – сосцы Твоя, имиже яко Младенца питала еси Его! К сим же, яже от Тебе суть, привлецы́ еще́ и я́же Он и́мать: крест, кровь, язвы, имиже мы спасаемся и хвалимся.

Вем, яко присно угодная творит Тебе, рождеством Ему на искупление мира послужившей. И се, исполнен мир весь благодеяньми Твоими. Ты всяку слезу от лица земли утолявши. Ты небесных возвеселявши и спасавши земных. Ты Творца умилостивлявши, Ты Ангелов и человек примирила еси; падших на высоту возвела еси. Тобою вся на лучшая премени́шася, и паче прежних в совершеннейшая всяческая преложишася. В Тебе и нашего воскресения зна́мение неложное и́мамы. Тобою Царство Небесное получити уповаем. Ты еси дарованная нам помощница спасения. Ты в рай вход отверзла еси нам. Ты восход к небу облегчила еси. Ты нас Сыну и Богу Твоему присвоила еси.

И Тобою, Пречистая, от Адама и до скончания века бе, есть и будет слава и честь апостолом, пророком, мучеником, преподобным! О Тебе, Благодатная, радуется всякая тварь, Тобою спасающися, и за Тя и через Тебе прославляющи Единаго в Троице Бога во веки веков. Аминь.